Datblygu Darpariaeth Ddysgu Ychwanegol trwy Ganolfannau Adnoddau Arbenigol ym Mwrdeistref Sirol Caerffili

Mae'r galw presennol am ddarpariaeth arbenigol, fel sydd wedi’i nodi drwy broses panel, ymgynghori gydag ysgolion, craffu ar gynlluniau datblygu unigol a chraffu ar ddata, yn dangos bod angen rhagor o ganolfannau adnoddau arbenigol sy’n gysylltiedig ag ysgolion prif ffrwd ledled y Fwrdeistref Sirol, ac felly nifer y lleoedd i blant ag anghenion dysgu ychwanegol o fewn darpariaeth arbenigol.

Pam rydyn ni'n ymgynghori?

Mae'r ymgynghoriad yn gofyn am safbwyntiau ynghylch datblygu darpariaeth sy'n gysylltiedig ag ysgolion penodol.

Ar gyfer y cynnig hwn, rhaid i'n proses ymgynghori ni ddilyn canllawiau statudol Llywodraeth Cymru fel sydd wedi'u hamlinellu yng Nghod Trefniadaeth Ysgolion 2018.

Ffyrdd o fynegi eich barn

Mae'r broses ymgynghori ffurfiol yn dechrau ddydd Llun 2 Mehefin 2025.

Yn unol ag adlewyrchu'r prosesau ar gyfer cynigion ysgolion a gynhelir, bydd cyfnod ymgynghori sy’n para o leiaf 42 diwrnod i roi digon o amser i gasglu adborth.

Y dyddiad cau ar gyfer ymatebion i'r ymgynghoriad hwn yw hanner nos ddydd Sul 13 Gorffennaf 2025.

Yn anffodus, ni fyddwn ni’n gallu ystyried unrhyw ymatebion sy’n dod i law ar ôl y dyddiad hwn.

Os hoffech chi wneud sylwadau ar y cynnig, gallwch chi wneud y canlynol:

• Llenwi'r ffurflen ymateb ar-lein ar wefan y Cyngor
• Cwblhau ffurflen ymateb wedi’i hargraffu a'i dychwelyd drwy'r post - d/o Tîm Cymunedau Dysgu Cynaliadwy; Y Gyfadran Addysg a Gwasanaethau Corfforaethol, Cyngor Bwrdeistref Sirol Caerffili, Tŷ Penallta, Parc Tredomen, Ystrad Mynach CF82 7PG
• E-bostio eich sylwadau at ysgolionyr21ainganrif@caerffili.gov.uk

Os hoffech chi gael yr wybodaeth hon mewn unrhyw fformat arall, er enghraifft print bras, neu yr hoffech chi gael help gyda dehongli mewn iaith wahanol, cysylltwch â ni ar 01443 864817 / ysgolionyr21ainganrif@caerffili.gov.uk fel bod modd gwneud y trefniadau angenrheidiol i ddarparu'r gwasanaeth hwn.

Camau Nesaf

Yn dilyn y cyfnod ymgynghori, bydd Cabinet yn cael Adroddiad Ymgynghori a fydd yn amlinellu'r cynnig a'r holl sylwadau a ddaeth i law gan y cyhoedd yn ystod y cyfnod ymgynghori. Yn ystod y cam hwn, gall yr aelodau benderfynu bwrw ymlaen â'r cynnig, gwneud newidiadau i'r cynnig neu beidio â bwrw ymlaen â'r cynnig.

Pe bai'r Cabinet yn penderfynu bwrw ymlaen â'r cynnig, bydd Hysbysiad Statudol yn cael ei gyhoeddi sy'n darparu cyfnod o rybudd o 28 diwrnod ar gyfer gwrthwynebiadau. Mae Deddf Safonau a Threfniadaeth Ysgolion (Cymru) 2013 yn nodi bod yn rhaid i unrhyw un sy'n dymuno gwneud gwrthwynebiadau i gynnig trefniadaeth ysgol gael cyfle i wneud hynny. Er mwyn cael eu hystyried yn wrthwynebiadau statudol, rhaid gwneud gwrthwynebiadau yn ysgrifenedig a'u hanfon nhw at y Cyngor o fewn y cyfnod o 28 diwrnod.

Yna, bydd y Cabinet yn ystyried canlyniad yr Hysbysiad Statudol mewn cyfarfod yn y dyfodol ac yn penderfynu a fydd y cynnig yn cael ei weithredu ar ôl rhoi ystyriaeth briodol i'r holl wybodaeth wedi’i darparu.